ivanliresearch
patreon
7大戶操盤嘅嘢：耶魯基金話你知— 2% Timing，7%揀股。咁91%係乜？ 另外，星展私人貸款廣告，但兼講其他嘢
🕑 Added 2023-12-22 17:57:13 +0000 UTC廣告：星展私人貸款。但兼講埋其他知識嘢
6厘樓上—咁但，聯儲局加咗5厘息喎，銀行拆息都5厘幾啦
你甚至應該問：銀行賺乜？
埃汾話唔好借錢投資。但有人話，既然一年10-12%，借4厘息有乜問題？
「咁借日圓又得唔得？」
呢篇補充返上次講嘅耶魯基金
耶魯endowment，都只係13%一年，但已經係大學中最好
不過35年，只得一年輸錢 — 點解？唔係因為時機好，係因為分散
但耶魯基金，2008年都輸錢。「分散都冇用」—但難道唔分散就有用？
其實講一年10-15%，好多人都「失望」— 咁可以點？買大，買長！
30年嘅投資，真係咁不能想像？你返工到退休，點都唔止。
我都買咗20年股票，可惜唔係持有20年。唯一後悔就係冇早啲開始投資
耶魯基金話你知：7%揀股，2%timing．估下90%係乜？
若果2013年買標普指數，咁你咩位買，年頭定年尾買，有乜分別？
大戶就話你知：資產配置最重要。而買得大，100% invested，也是配置
廣告：星展私人貸款。但兼講埋其他知識嘢
1. 首先賣個廣告—但仲會講埋其他有用嘅嘢，在呢度賣廣告之餘我都希望帶到其他知識畀大家。廣告係星展嘅私人貸款。詳情Facebook Page已經有。呢個貸款門檻夠低，批嘅額亦夠高。仲有啲回贈奬賞幾好，即使你借10萬，回贈超市現金券都近3000。（借夠150萬嘅，回贈兩皮幾近三皮添，但唔好借咁大吧）。申請嘅link呢度
2. 另外留意返，上面回贈數字兩份夾埋，星展畀你＋Money Hero畀你。Money Hero嗰份就新客多啲，舊客少啲。詳情睇表，個圖cap唔晒
6厘樓上—咁但，聯儲局加咗5厘息喎，銀行拆息都5厘幾啦
3. 但你問我，「缺點」，就係息貴。照計都做到6厘以上。咁但我在Facebook Page都有寫，聯儲局由零息加到5厘幾，出面銀行拆息都5厘幾，你就不能同幾年前零息年代比了。
你甚至應該問：銀行賺乜？
4. 甚至有啲夠醒目嘅，你甚至應該問：銀行賺乜？夠冚埋啲行政費？答案嘛：首先，銀行仲有好多低息嘅儲蓄存款，你見銀行綜合資金成本仲係3厘樓下（但呢個數係成個行業，咁大家知匯豐中銀恒生成本特低，deposit base大，星展怕且唔止）。另外有啲銀行就蝕住做，上客。但仲有更重要嘅係：之後應該減息嘛，銀行啲倶金成本應該會跌，拆息會跌，定存息就一早減埋你添。之但係，你貨款個息，佢就鎖死咗你嘛。
5. 於是乎有人諗：咁而家借錢，其實冇乜著數？簡單答案：梗係！加咗5厘息你先去借。金融101啦，嚟緊減息，咁你而家借定息，一般都冇著數（雖然其實唔係咁簡單：因為你可以話啲定息都反映咗將來嘅減息預期。所以你話係咪三個月後借平啲，唔敢包。但兩年後就怕且會平啲）。
6. 無論如何，借都應該去到6厘樓上，你真係爭落卡數或有其他貴嘅貸款，先好去借。雖然我有得分，但唔會因為咁，就係咁叫你去借嘅，都有啲良心嘅
埃汾話唔好借錢投資。但有人話，既然一年10-12%，借4厘息有乜問題？
7. 事實上，有卡數找有貴息貸款還就值得借。但借錢投資，就唔好了。以前都有人問過：既然股市有10-12%回報（呢個係realistic 嘅期望），咁點解唔可以借4%嘅去投資？這個嘛：二樣嘢。首先，如果你可以長期都鎖定4%先有呢回事，但你多數借到嘅錢都係浮息，銀行唔會咁益你。第二：如果你唔使還instalment，長期可以只係畀4%息唔使還本，咁都仲有得討論。但實際上好難做到。你借私人貨款，按層樓，全部都要你還本。你借券商孖展咪唔使還本，但首先你要有咁多貨，另外亦唔會平到4%。
「咁借日圓又得唔得？」
8. 仲有啲天才，就話去借日圓孖展。呢個都討論過：你都知，一升值你就死啦，近排日圓都升唔少。但如果你拎嚟買日本股，理論上就「通沖」咗個匯率風險，因為日圓跌你還多啲錢，但堆日本股換做港紙都升咗。
9. 所以呢？你可以話唯一值得討論嘅，就係借日圓買日本股（其他股就一定唔好），就真係因為息低。但不過：過去N年都有人做呢啲嘢，係去到近年日本股市先有起色啫
10. 無論如何，在Facebook貼咗呢個星展貸款，反應居然都唔錯，比我預期好（我睇到有幾多人申請的），可能對某啲人真係吸引。你想申請嘅，就用我個專屬link．申報返，我係有錢分返的。
11. 我嘅專屬申請link：
https://apply.creatory.hyphengroup.io/click?o=198&a=234
(請記得7日內填「獎賞換領表格」揀禮物)
呢篇補充返上次講嘅耶魯基金
12. 呢篇想補充下上次講過嘅耶魯基金。神級嘅David Swensen，都只係一年13%，但已經近乎係大學endowment 嘅第一。佢出咗兩本書，你可以買嚟睇下（呢本，同呢本，我冇佣分的）
13. 留意Swensen唔係死咗好多年，早兩年先死。亦唔係啲咩遠古世紀嘅人（陣間你又話年代太遠無可比性），死嗰時都幾後生，70未到。耶魯endowment 佢1985年接手，當時13億，到2020年6月時312億。
14. 亦留意，雖然你話中途佢會有新錢入，肯定有人再捐錢。但同時間佢亦要「派息」，資助返耶魯嘅各種開支。所以呢13%回報，應該係計及晒以上嘅嘢。
15. 亦留意一樣嘢：24倍回報。但用咗35年。呢啲就係複利的威力。用嚟反駁你嘅「人生有幾多個十年」「in the long run we are all dead」
耶魯endowment，都只係13%一年，但已經係大學中最好
16. 但當然了，佢地呢種東西，就一般唔會100%股票嘅，就真係要平衡，否則回報可能仲高啲。
17. 有趣係其實佢接手之前，個endowment就真係美股同美債，佢就係第一個覺得要「分散」嘅，要買外國股票，甚至房地產，買PE。特別亦留意佢係願意犧牲咗啲流動性—上次篇文講過，佢就靠犧牲呢啲人地覺得值錢嘅嘢，自己換取更高回報。
不過35年，只得一年輸錢 — 點解？唔係因為時機好，係因為分散
18. 仲有一樣幾重要嘅嘢：佢接手呢35年 — 只有一年輸錢！呢樣嘢對某啲人嚟講好重要，因為某啲讀者（我就唔會）好介意輸錢。咁的話，你就特別可以留意佢呢種玩法：贏錢未必去到最多，但輸錢嘅年份極少！
19. 而你諗下，佢可以做到35年得一年輸錢，但仲有13%回報，就真係勁。換個方法講：你100%%股票嘅，可能唔止13%回報（例如畢菲特）—但就未必做到35年得1年輸錢了
20. 好啦，咁佢35年只得1年輸錢靠乜？唔係因為佢揀股叻，唔係因為時機捉得好，而係靠分散！咁你話，分散有冇用？
21. 同做60-40異曲同工，不過佢分散得比60-40更好。如果60-40係美股美債，咁 2001 2002都要輸錢（睇圖）。
22. 不過2008金融海嘯，就真係Swensen都投降了，亦係耶魯endowment 佢任期內唯一一年輸大錢。點分散都冇用，都要一年輸超過25%。點避免？冇得避免，百年一遇，幾時有人話畀你知投資可以保證每一年都一定唔使輸？
但耶魯基金，2008年都輸錢。「分散都冇用」—但難道唔分散就有用？
23. 咁又係睇你點睇，一啲奇怪嘅人覺得「分散都冇用」—但絶對係偽命題，請大家戒咗呢啲聽落好似好smart嘅講法。你話分散冇用，咁唔通唔分散就有用？你拎一年嘅數字嚟講？況且冇人可以保證每一年都贏錢（除非做定期，即係輸死畀通脹）。重點係，佢輸咗25%後，舊錢仲係大過開頭好多。而且，之後嗰十年更加強勁
24. 不過去到2022年，相信亦係好似2008咁，點分散都死。但唔關佢事，死咗了。
其實講一年10-15%，好多人都「失望」— 咁可以點？買大，買長！
25. 最後補充，講一年10-15%，好多人都「失望」。咁但幾個層面睇。首先，你失望都幫唔到你，最好面對現實，我唔明啲人點解可以「期望」自己有30%回報。咁點解你唔期望300%？邊個理你嘅期望？
26. 咁第二，在好嘅年份，你就好可能唔止10-15%嘅，今年你齋買標普指數都23%啦。只係留意，未必年年咁好景，你要計埋你回報低啲，甚至輸錢嘅年份嘛。
30年嘅投資，真係咁不能想像？你返工到退休，點都唔止。
27. 仲有第三，複利的威利。一年15%，5年就一個開。30年就近70倍！30年嘅投資，真係咁不能想像？其實由你返工到退休，應該點都唔止30年。我唔明點解啲人話冇得睇長線。
我都買咗20年股票，可惜唔係持有20年。唯一後悔就係冇早啲開始投資
28. 我都買咗20年股票— 就可恨之前都係出出入入，唔係持有足20年，否則就退咗休。所以，你話時間係咪你朋友？我唯一後悔，就係冇早啲開始投資，同埋冇一路持有，近十幾年先學會教訓。
29. 所以亦係最好：你買得大，就見到個效果。而唔係幾百萬拎幾萬蚊出嚟買，贏幾倍，然後又輸晒咁。
耶魯基金話你知：7%揀股，2%timing．估下90%係乜？
30. 關於耶魯基金，仲有一樣好有趣嘅嘢：好多人，一定會同你講，timing 好重要，揀股好重要。但David Swensen話你知，根本唔係咁
31. 呢張圖都幾出名，佢就話你知，你回報嘅九成，係受資產配置影響。7%係「標的挑選」—即係你揀乜股，揀乜債。時機嘅影響，只佔2%
32. 係咪同你常識好唔同？你話，唔係喎，我年年低位買高位沽咪得。我揀中隻Tesla一早借爆孖展買咪得
33. 問題係，有啲人揀中股賺大錢，但有啲人係輸大錢你就唔講。所以net咗，揀股佔嘅比重，就唔係咁重要。時機嘅情況一樣：點可能次次捉到靚時機？你有時捉到好時機，但亦有差不多機會揀正壞時機。拉勻晒，就變咗得個桔
若果2013年買標普指數，咁你咩位買，年頭定年尾買，有乜分別？
34. 同樣地，我10年前買標普指數嘅，我1500點定1700點買？去到而家近5000點，其實有幾大分別？我2013年年頭定年尾埋，其實又有幾大分別？而我講標普指數喎，唔係事後cherry pick一隻個股。
35. 拉勻所有人，所有錢，你發現真係資產配置最重要—換個講法，你100%美債嘅，就肯定冇可能一年15%回報的 — 個別年份得，但拉長一定唔會好過股票。同樣地，你100%%定存嘅，就當然永冇可能上流 — 根本講「資產配置」，已經imply埋我一路講嘅「100% invest」「買得大」—因為你有錢而閒置唔拎去買股票，呢度咪已經係一種配置（配置咗saving account, or even worse，放咗上天花板）
大戶就話你知：資產配置最重要。而買得大，100% invested，也是配置
36. 拿，人地神級投資者呀下。冇錯，佢係「機構投資者」，但大戶就基本上實係機構投資者。況且，佢第二本書其實係講personal investment
37. 成日話咩要學「大戶操盤」嘅人，又有冇理呢啲嘢？定只係自high，選擇性接收，「總之我就最低買最高沽，無驚無險年年3倍回報，3年100萬炒上3000萬退休」
